© Marco Volken
Parc Adula nr. 5 – Energias regenerables
In parc naziunal modern ed attents als problems dad oz
Andrea Galli, Cumissiun da direcziun Associaziun Parc Adula
Avon ch’jeu fagevel part dalla gruppa operativa associav’jeu empau alla sperta il concept dil parc naziunal sulettamein cun duas noziuns: Il schurmetg dalla natira ed il scamond da tuttas intervenziuns dil carstgaun. Quell’idea subjectiva derivava cunzun dall’experientscha ch’jeu havevel fatg, sco aunc biars auters, cun visitar il parc naziunal engiadines a Zernez. Quel festivescha uonn il 100avel anniversari ed ei vegnius scaffius a sias uras sco zona da schurmetg absolut.
Cun s’occupar dallas reglas dalla protecziun e cun participar al svilup dallas tematicas corrispundentas da quei parc, sundel jeu s’encurschius ch’il Parc Adula ha autras finamiras. Igl ei in project giuven aviarts per las relaziuns dil 21avel tschentaner. Oz havein nus aunc auters problems, per exempel quel da garantir e mantener il patrimoni cultural e dalla natira, il svilup economic ellas zonas circumdontas e la producziun d’energia persistenta. Exact lezza tematica ei el center dalla tschunavla ediziun da questa revista.
Ei setracta d’ina tematica che stat a cor als cantuns che promovan il parc. Igl ei impurtonts producents d’energias regenerablas, seigi quei el sectur hidroelectric ni enten utilisar la biomassa (particularmein quella dalla lenna).
D’ina vart vul il project d’in parc naziunal pussibilitar da studegiar pusseivladads da trer a néz – ella regiun che ha interess – fuormas d’energia durablas. Da l’autra duei el gidar da perscruttar il svilup da tecnologias da spargnar energia. Il generalesser metter a disposiziun il spazi da perscruttar pusseivladads co ins sa migliurar las consequenzas per l’ecologia denter producziun e diever d’energia. Las fuormas da collaboraziun dil parc cullas scolas politecnicas federalas lubessen da garantir a nossa regiun il support necessari per revaletar las resursas localas en connex cun promover las energias regenerablas.
En quella sparta vegn il Parc Adula ad agir sco plattafuorma che stat a disposiziun als uffecis publics e privats ella regiun, tals savessen lur daventar ils promoturs locals da novs projects innovativs. En quei senn ei il Parc Adula ina buna opziun per nossa regiun. Lezza profitescha d’in immens patrimoni dalla natira e sa aunc mantener la qualitad da quel.
Il project dil parc naziunal digl Adula duei valer sco voluntad d’ina regiun alpina da mantener ina aulta qualitad da viver en in ambient prezius. Quei sa vegnir fatg cun revaletar ils products e cun garantir in diever raschuneivel dallas resursas dalla natira en tuts secturs
