Parc Adula

Christian Simmen 

Christian Simmen, Directur Sennerei Nufenen. La societad cooperativa latgaria-cascharia ei vegnida fundada igl onn 1846. Dapi igl onn 1992 producescha la cascharia sin fundament dallas directivas da Bio Suisse. Il latg furnius da 21 famiglias da purs daventa caschiel alpin da Nueinasrin.

PA. Christian, co eis ei iu che ti lavuras oz en quella cascharia?

CS. Jeu sun mez carschius si en in menaschi che produceva latg, hai empriu da pur ed absolviu ina formaziun supplementara mercantila. Avon circa 17 onns ei il responsabel dalla cascharia da gliez temps sedecidius da seretrer, ed aschia sun jeu vegnius eligius nunspitgadamein a caschun dad ina radunonza dalla societad cooperativa sco successur. Il rest ei vegnius da sez. Era oz sun jeu aunc mez pur da latg e separticipeschel aschia en pliras modas vid la cadeina da creaziun da valur.

PA. Tgei ei il special vid  vossa cascharia?

CS. D’ina vart ei quei nies product, il caschiel alpin bio, da l’autra vart la cascharia sezza. Biars process vegnan susteni mecanicamein ella cascharia, mo la lavur da precisiun che garantescha la qualitad dil caschiel a nus vegn aunc adina fatga a maun. Il latg viva, ed en cuntrast cull’industria savein nus s’adattar mintga di cun bia sentiment agl optimum da nies caschiel. Il contact direct culs producents da latg possibilitescha era a nus da segirar la qualitad dil latg da mintga singula vacca. Nies product ei in product da nischa che madira pli ditg che caschiel industrial e sa perquei era subsister sin fiera cun in prezi pli ault. Culla quantitad savessen nus mai tener petg sin fiera. Cunquei che la cascharia s’auda als purs da latg, ei la producziun dil latg colligiada stretgamein cun sia elavuraziun. Cura che nus havein giu da renovar il magasin da caschiel igl onn vargau, havein nus prestau persunalmein 4500 uras da lavur ensemen, tgei che ha aunc dau dapli forza a nossa collaboraziun. Nus essan tuts conresponsabels pil success dalla cascharia.

PA. Eis ti loschs da tes collaboraturs ella cascharia?

CS. E co! Per mei eis ei impurtont da contribuir al svilup d’ina regiun economicamein fleivla sco la nossa. La cascharia porscha plazzas da lavur, creaziun da valur ella regiun e cun nies product scaffin nus era identificaziun.
 

PA. Sche ti savesses giavischar enzatgei pigl avegnir dalla cascharia, tgei fuss quei?
 

CS. Jeu giavischel che nus tuts cumpigliai haveien era vinavon las medemas finamiras. Jeu sun perschuadius che nus reussin aschia era egl avegnir da surmuntar ensemen aults e bass. Ultra da quei gavischel jeu aunc a nus ina buna purziun cletg che fa mai donn.

PA. Tgei vegn il Parc Adula a muntar per vus?
 

CS. Il parc ei aunc ussa buca fetg enconuschents. Sch’il project reussescha denton dad esser in parc naziunal special e buca mo in parc regiunal, lu va quei bein a  prau cun nossa filosofia, pertgei nus representein las medemas valurs fundamentalas sco tradiziun, qualitad ed „autenticitad aultalpina“.

Parc Adula, 30 | 6 | 2012