© Denise Dillier
Denise Dillier
Denise Dillier ei directura da Viamala Tourismus. Ella ei stada participada essenzialmein enten fundar l’organisaziun regiunala ch’ei resortida igl onn 2012 dalla fusiun dad otg uniuns turisticas localas. Denise Dillier, carschida si el cantun Basilea-tiara, ha sias ragischs per part a Spligia. Sia mumma deriva da quei liug.
PA. Co s’integrescha il project d’in parc naziunal ellas activitads da Viamala Tourismus e tgei perspectivas porscha quel?
DD. Finamira da Viamala Tourismus eis ei da promover in turissem datier alla natira ed alla cultura. Ella sparta turistica ha il project dil parc naziunal las medemas finamiras, el sustegn aschia nossa filosofia vertenta. Cunquei sa il project esser in partenari strategic che va ella medema direcziun. Da cuminonza san ins trer a néz sinergias e migliurar l’attenziun e la preschientscha d’omisduas activitads.
PA. Viamala Tourismus savess el futur dar albiert a plirs parcs. D’ina vart ei cheu il parc natiral Beverin che ha entschiet ils 2013 sia emprema fasa da gestiun da diesch onns. Dall’autra il project per in parc naziunal. Co san ins trer a néz omisdus e gudignar raps?
DD. Sco regiun turistica sesanflein nus daveras en ina situaziun avantagiusa fetg speciala. La vischnaunca da Sufers schai el perimeter dil parc Beverin. Spligia, Nufenen e Valrein s’audan daferton tiel territori dil parc naziunal Adula. Impurtont eis eis ei per nossa organisaziun da coordinar ils differents projects turistics. Pil turissem ei quei ina ideala basa da partenza. In parc porscha la gronda schanza da sesviluppar, quei che nus havessen autruisa buc. Las experientschas cul parc natiral Beverin muossan ch’ins sa buca veser in parc mo sco fontauna da raps, mobein en emprema lingia sco partenari impurtont. Grazia allas resursas supplementaras da persunal savein nus oz realisar projects che nus savessen persuls buca far. Leutier s’auda buc il davos la savida professiunala dils collaboraturs dil parc. Il Parc Adula fuss per nus segir ina petga glischonta che enrihess la purschida turistica e che tarlischass el medem mument lunsch sur ils cunfins ora.
PA. Tgei posiziun ha la populaziun ella regiun da Valrein enviers il project Parc Adula?
DD. Ils habitonts dalla vallada da Valrein ein oriundamein Gualsers ed han ina moda e maniera plitost sceptica e precauta. Tuttina hai jeu buca l’impressiun ch’els seigien temeletgs. Denter auter perquei ch’il parc natiral Beverin ella vischinonza semuossa sco exempel positiv. Quei naturalmein en fuorma pli pintga, pertgei las damondas, las dimensiuns e las premissas ein pli cumplexas tier in parc naziunal che tier in parc natiral. En scadin cass ha la populaziun oz – sch’ella vul – la pusseivladad da sedar giu concretamein cun experientschas e da s’informar direct. Il concept dil parc ei buca diltut jasters.
PA. Co sa la marca „parc naziunal“ contribuir a novs projects pil svilup regiunal?
DD. Sch’ins ei aviarts e vegn cun ideas, sa la marca porscher la schanza da sesviluppar. Negin vegn d’anora tier per sligiar ils problems dalla regiun cun gir a nus tgei che seigi da far. Ed era sche nus havein in gi il label „parc naziunal“, vegn ei ualvess a plover daners giu da tschiel. Perquei eis ei impurtont che la populaziun ei interessada, ch’ella sefa valer, ch’ella porta viaden ideas ed observa co il project cuntinuescha. Nossa schanza ei effectiv quella da separticipar proactiv cun esser integrai els process. Quei ei claramein ina dallas fermezias dil project per in parc naziunal.
Parc Adula, 30 | 9 | 2015
