Parc Adula

Co il parc vegn administraus 

La proposta per la structura administrativa dil parc vegn presentada alla populaziun ella consultaziun publica ellas 17 vischnauncas. Nus resumein ils puncts corrispundents.

Per la fasa da menaschi eis ei previu da scaffir novas sedias pils centers adminstrativs. Quellas dueien vegnir colligiadas stretg cul sistem dils centers d’informaziun pils visitaders dil parc. Ord quella vesta dueien ins veser ils biros dil parc, ils posts externs ed ils biros turistics sco centers d’informaziun per visitaders e per la populaziun locala. El suandont presentein nus ils detagls co igl ei previu d’organisar il menaschi dil parc.

La proposta per la direcziun dil Parc Adula preveda 3 centers principals ch’ein reparti suandontamein.

Center A
En quei center vegn la direcziun generala ad haver sia sedia. Plinavon vegnan ad esser leu il biro per la zona centrala ed il GIS, il biro da communicaziun e dalla marca dil parc sco era l’administraziun. Il liug definitiv dil center A (Moesano ni Surselva) vegn aunc giudicaus actualmein. Diember da persunal: 4 persunas.

Center B
En quei center vegnan ils delegai per la promoziun dall’economia, la formaziun digl ambient, agricultura, svilup regiunal e l’administraziun plazzai. Il liug definitiv dil center (Moesano ni Surselva) vegn aunc sclarius exact. Total diember da persunal: 5 persunas.

Center C
En quei center vegnan ils biros pils projects da perscruttaziun endrizzai, plinavon igl uffeci per la promoziun dall’economia dalla Val Blegn, igl uffeci per natira e biodiversitad sco era il biro da monitoring. Quei center C vegn domiciliaus ella Val Blegn. Diember total da persunal: 4 persunas.
 

Posts externs
Tier quels 3 centers principals ein 3 posts externs pil svilup regiunal previ. Quels vegnan a s’occupar oravontut dallas tematicas economia, geografia, ecologia e tgira dalla cuntrada. Quels biros ein reparti suandontamein:
•    Viamala: 1 persuna
•    Surselva: 2 persunas
•    Calanca: 1 persuna

InfoPoint.
Plinavon dueien vegnir scaffidas plazzas da lavur en collaboraziun cullas organisaziuns turisticas regiunalas existentas, e quei en fuorma da mandat. En special preveda il rom suandonta repartiziun:
•    Surselva: 1 persuna
•    Viamala: 1 persuna
•    Mesolcin: 1 persuna
•    Calanca: 1 persuna
•    Valle di Blenio: 1 persuna

En tut vegnan scaffidas 18 plazzas da lavur cumpleinas, inclus ils rangers dil parc.