Parc Adula

Svilup regiunal 

Il potenzial dalla marca Parc Adula. Basa communabla pil svilup economic dallas regiuns dil Parc Adula.

Gianluca Giuliani, Dipl. Ing.-Agr. ETH

Da principi concurrenzeschan las tschun regiuns el territori dil project Parc Adula cun in grond diember da destinaziuns el medem segment turistic e cun semegliontas particularitads. Ellas disponan buca d’in special avantatg cumpetitiv ed ein pertuccai pli u meins tuttas d’ina latenta digren da populaziun. Enviers quellas regiuns e semegliontas ellas Alps porta l’avertura dil Parc Adula a sias regiuns silmeins dus avantatgs cumpetitivs:
 

1. Esser participaus vid in parc da muntada naziunala motivescha ils acturs locals da fixar ina lingia communabla pil svilup regiunal la quala ei coerenta e representativa per tuts. Ins duess buca sutvaletar igl avantatg d’ina versiun da svilup persistent ch’ei determinada communablamein. Pertgei gia savens havein nus visitau regiuns nua ch’igl ei insumma buca stau clar nua ch’ins tschenta las prioritads. D’ina vart traian ins neutier industrias da tut gener, lu promov’ins el medem mument il turissem migeivel e vitier aunc il turissem da massa. Ei resta anavos il sentiment ch’ins hagi visitau ina regiun senza olma, ina regiun che lai anavos neginas regurdientschas.
2. Il diever exclusiv dalla marca „Parcs svizzers“ arva a tuttas regiuns dil parc adina megliers canals da communicaziun e novas pusseivladads d’entrar en fieras ellas qualas ellas havessen autruisa negin access.

Cul label Parc Adula vegn il reflectur drizzaus sils products e survetschs dallas interpresas localas.

Il rinforz ella communicaziun augmenta considerablamein il renum dalla marca „Parc Adula“ e dallas valurs che quella transpona. Ordlunder crescha la preschientscha dils products e survetschs sezs ella fiera, quei ch’ei cumbinau cun in grond diember d’avantatgs. Cheu ei da menziunar il pli emprem che products ch’ein signai cul label „Parc Adula“ seprofileschan dalla massa d’auters products e prestaziuns el commerci. Per interpresas che porschan products e survetschs cun quei label, sesarvan las suandontas pusseivladads concretas:

• Igl ei da partir da quei anora ch’igl augment da preschientscha vegn a generar ina damonda augmentada suenter products ni survetschs cun label, quei che vegn a catschar siadora la sviulta. Igl augment da sviulta san ins contonscher sur ils canals da vendita existents ni sur auters canals ni novas nischas ella fiera.
• Igl augment ella sviulta munta buca exnum ch’il volumen ella producziun ed ella vendita s’augmenti. Ins sa era semplamein augmentar la sviulta tras hosps che qualificheschan pli ault il product ni il service. Quella plivalur san ins giustificar demai ch’il producent tschenta in accent silla producziun durabla e ch’il client ei dall’autra vart plitost promts da pagar in prezi pli ault per products ni survetschs exclusivs.
• Vinavon eis ei probabel ch’il volumen da producziun e da vendita e la valur commerciala dils products s’augmentan, quei che influenzescha senza dubi da sviulta.

Vitier tut quei eis ei da partir dil fatg che la vendita creschi essenzialmein demai ch’ei vegn a dar dapli damondas per products e survetschs ordeifer las tschun regiuns dil parc, vul dir d’autras regiuns svizras ni digl exteriur. In tal svilup ei giavischabels ord vesta dalla promoziun dall’economia regiunala. Sch’ins risguardass buca las prestaziuns dil maun public (p. ex. pensiuns e rentas, subvenziuns e pagaments d’ulivaziun), fuss ei numnadamein fetg grev da arver resursas economicas exteriura per las regiuns.

Meglier veseivel, interess carschent, dapli visetas, dapli sviulta.

Distribuir e vender products cul label Parc Adula ordeifer il perimeter dil parc augmenta l’attenziun dils consuments, oravontut da visitaders pusseivels ellas tschun regiuns dil parc. Igl ei da spitgar che quella attenziun migliurada vegn a semussar tras en in augment da visitaders. La finala vegn il parc a purtar ad interpresas da producziun e da survetschs in augment ella sviulta.
 

Il potenzial economic d’in augment da visitaders ellas regiuns cun in parc dalla natira ei descrets e documentaus fetg bein en Svizra (mira p. ex. las retschercas tiel parc naziunal ell’Engiadina Bassa da I. Küpfer, igl onn 2000, da D. Siegrist igl onn 2009 e d’ina squadra cun N. Backhaus igl onn 2013). Ei vegn partiu dil fatg che mintga visitader dat ora ina certa summa daners. Tgi che pernottescha dat secapescha ora dapli ch’in hosp che viseta il parc mo in di. Tiel parc naziunal ell’Engiadina Bassa schazegian ins che mintga visitader detti ora ella media cun pernottar rodund 135 francs a di (Backhaus, 2013), in hosp dil di perencunter cumpra products e prestaziuns ella valeta da 35 francs. Grazia ad in schazetg dètg exact da persunas che vegnan ell’Engiadina Bassa per visitar il parc naziunal han ins saviu eruir ch’il visitader dat ora 5 francs ella regiun per cumprar products e prestaziuns, quei quintau sin mintga franc che l’organisaziun dil parc drova per salaris ed infrastructura.

Priu il cass che la purschida satisfa alla damonda spitgein nus ch’il visitader detti ora ella media dapli el parc. Tier las interpresas localas sco ustrias, hotels e pensiuns, pasternarias, mazlarias e mistergners caschuna quei svilup in augment dalla sviulta. Ins vegn pia a constatar era cheu in impuls da resursas economicas naven dils centers economics ella regiuns periferas
dallas Alps.